Në mjediset e Muzeut Arkeologjik të Durrësit u përkujtua në një aktivitet në ditën e lindjes shkrimtari, historiani, publicisti, intelektuali europian, studiuesi i njohur i trashëgimisë kulturore të popullit shqiptar, Moikom Zeqo.

Në aktivitetin e zhvilluar dje ishte e pranishme kryetarja e bashkisë së Durrësit, Emiriana Sako, si dhe personalitete të njohur të fushave të ndryshme.

“Emri i tij është i lidhur jo vetëm me Durrësin, të cilit, me veprën e tij të shumanshme, i dha nder e krenari, por në shkallë kombëtare e ndërkombëtare. Për meritat, vlerat dhe kontributin e tij të çmuar Moikom Zeqo është nderuar nga bashkia e Durrësit me titullin qytetar nderi i Durrësit në vitin 2015 kur ai ishte ende ne jete dhe aktiv dhe i përkushtuar në punën tij me vlera te jashtëzakonshme”, – tha Sako.

Kryebashkiakja Sako u shpreh se “Durrësi ka nxjerrë shumë personalitete që na kanë bërë krenarë të gjithëve me kontributin e tyre. Njëri prej tyre është padyshim Moikom Zeqo i cili i me veprën e tij shumëplanëshe i shërbeu jo vetëm qytetit tonë, por të gjithë kulturës sonë kombëtare”.

Personalitete të njohur vlerësuan gjithashtu në fjalën e tyre figurën e Moikom Zeqos.

Moikom Zeqo lindi më 3 qershor 1949 në qytetin e Durrësit. Ai ka lënë pas rreth 100 tituj librash në poezi, prozë, eseistikë, studime arkeologjike, për historinë e artit, si dhe një numër skenarësh për filma kinematografikë e televizivë me karakter arkeologjik dhe kulturor. Veprat e tij janë përkthyer më disa gjuhë të huaja, anglisht, esperanto, gjermanisht etj. Historiani Moikom Zeqo është vlerësuar me Urdhrin e Lartë “Mjeshtër i Madh” dhe atë “Gjergj Kastrioti Skënderbeu”.

Moikom Zeqo u nda nga jeta në 15 qershor 2020 në moshën 71-vjeçare, pas një sëmundjeje të rëndë.