Gjatë një interviste për mediat, deputeti i Partisë Demokratike, Ferdinand Xhaferraj ka folur për situatën në PD duke thënë se edhe kryedemokrati Lulzim Basha por edhe ish-kryeministri Sali Berisha nuk mund të jetë zgjidhja për PD-në. Sipas tij, të dy ata nuk mund të garojnë më kundër kryeministrit Edi Rama.
“Minimumi i demokracisë është të japësh dorëheqjen. Pas 6 marsit më thoni ju mua një arsye pse duhet ngritur dora për Lulzim Bashën. Sigla e PD-së ka rënë në 6% dhe u mund ndjeshëm nga një person i shpallur ‘non grata’. Sikurse nuk është zgjidhje as Sali Berisha. Ai vërtet mundi ndjeshëm Lulzim Bashën, por ndjeshëm humbi edhe ndaj Ramës. Basha ikën, zgjidhet një grup deputetësh që drejton partinë në kohën kur kryetari nuk është” – tha Xhaferraj.
Xhaferraj gjithashtu shtoi se ka personazhe edhe nga grupi i “Foltores” që nuk e konsiderojnë më ish-kryeministrin si zgjidhje për rotacion politik.
“Ky grup diskuton me kolegët e foltores, se edhe aty ka nga ata kolegë që mund të biem dakord se ashtu si Basha edhe Berisha nuk është zgjidhje. Nuk mund të shkohet në zgjedhje kundër Ramës me një ‘Non grata’. Pa Bashën dhe Berishën sepse të dy janë pjesë e problemit, dhe jo e zgjidhjes”– u shpreh Xhaferraj.
Discussion about this post