Kryetarja e Komisionit Hetimor për inceneratorët, Jorida Tabaku shprehu keqardhjen që disa nga deputetët mbështetës të ish-kryeministrit Berisha votuan kundër raportit që PD nxori nga Komisioni për inceneratorët.
Në një deklaratë për shtyp në selinë blu, Tabaku theksoi se ata mund të kishin shmangur votimin, por jo të votonin kundër raportit të Partisë Demokratike.
“Ju i keni ndjekur një pjesë të madhe mbledhjet. E keni parë që pavarësisht ndasive që mund të kemi, ishim në një mendje për opozitën në këtë komision. I kam dhënë hapësirë maksimale çdo kolegu për të dëgjuar mendimin e kujtdo. Kam ndjerë keqardhje që deputetë të PD bashkojnë votën me Edi Ramën për të mbrojtur aferën më të madhe korruptive. Nuk ka justifikim për askënd që nuk më erdhi raporti. Sjellja më normale është që të mos votojnë fare dhe jo kundër. Nuk gjej asnjë arsye pse duhet të bashkosh votat me Edi Ramën kundër punës tënde. Besoj se në këtë proces kemi pasur shumë pengesa dhe duhet të ishim në një zë. Duhet të ishim të gjithë bashkë në miratimin e këtij raporti. Nuk dua të përdor fjalën tradhti, por ndjej keqardhje që disa deputetë nuk ishin në sallë. Por ata që kanë votuar kundër shprehem qartë”, tha Tabaku.
Tabaku njoftoi se PD do të depozitojë sot në SPAK kallëzim penal për 50 persona lidhur me aferën e inceneratorëve, ku përfshihet edhe kryeministri Edi Rama.
Discussion about this post