Bravo me lajmet!

Nga Lutfi Dervishi

I shihni lajmet këto ditë?! Janë mbushur me pasqyrimin e krizës së çmimeve. Dhe nuk mjaftohen vetëm duke dhënë situatën, por analizojnë pse jemi këtu ku jemi?! Bëjnë krahasimin me vendet fqinjë dhe vendet e BE-së!

Krahasojnë masat që janë marrë atje me masat që do të merren këtu.  Parashikojnë variantin më të mirë dhe atë më të keq. Tregojnë se si e përballon krizën një çift pensionistësh! Hulumtojnë zinxhirin e çmimeve që nga çmimi në bursë, te zhdoganimi, te pika e shumicës e deri tek shitja në dyqanin më të humbur.

Intervistojnë ekspertë për të sugjeruar masat më të mira që duhet të ndërmarrë qeveria dhe vetë konsumatorët. Marrin opinione të shtresave në nevojë! Vënë para përgjegjësisë dhe ndonjëherë edhe në lojë deputetët që bëjnë gjasme kontroll çmimesh në tregje. Kritikojnë qeverinë për reagim të vonuar dhe minimal ndaj krizës.

Bëjnë kronika për shtresat sociale më të goditura nga kriza dhe i vënë në kontrast me shtresën e mesme dhe të lartë. Analizojnë ndikimin e krizës në sektorët e ndryshëm të ekonomisë. Bëjnë apel për solidaritet. Me një fjalë, si zakonisht bëjnë lajmet e njerëzve, me njerëzit dhe për njerëzit. E vetmja mangësi është se nuk japin asnjë lajm për aktivitetin e kryeministrit dhe qeverisë!

Bravo!