Ditën e sotme është nisur sot për në Hagë të Holandës Ministrja e Drejtësisë së Kosovës, Albulena Haxhiu për të takuar ish-krerët e UÇK-së në paraburgimin e Gjykatës Speciale. Ministrja, Haxhiu shoqërohet nga nënkryetarja e Kuvendit, Saranda Bogujevci, kryetari i Komisionit për Legjislacion, Adnan Rrustemi, si dhe deputeti Erxhan Galushi.
Në një përgjigje për mediat kosovare, Ministria e Drejtësisë tha se delegacioni me në krye ministren Albulena Haxhiu do të takohet me të gjithë ish-pjesëtarët e UÇK-së që po mbahen në paraburgim, përveç ish-presidentin Hashim Thaçi, ish-kryeparlamentarin Kadri Veseli dhe ish-shefin e inteligjencës së FSK-së, Salih Mustafa.
“Delegacioni nga Republika e Kosovës do të takohet me Jakup Krasniqin, Rexhep Selimin, Hysni Gucatin, Nasim Haradinajn dhe Pjetër Shalën” – thuhet në përgjigjen e Ministrisë së Drejtësisë.
Sipas raporteve të fundit Hashim Thaçi dhe Kadri Veseli kanë refuzuar takimin me Haxhiun për herë të dytë.
“Ne kemi pasur një vizitë në Gjykatën Speciale, përpos zotit Thaçi dhe Veseli që nuk kanë dashur të takohen me përfaqësuesit e Ministrisë së Drejtësisë, kemi takuar zotin Krasniqi, Selimi dhe Gucati. Thaçi e Veseli nuk kanë dashur të takohen me përfaqësuesit e Ministrisë së Drejtësisë” – kishte thënë Haxhiu.
Discussion about this post