Një grua 75-vjeçare, e identifikuar si Alice.F., rreth tri vite më parë, në mars të vitit 2019, vrau Iliasin, të miturin 7 vjeçar shqiptar, teksa po kthehej nga shkolla dhe po shkonte në shtëpi në Bazel të Zvicrës.
Menjëherë pas krimit, autorja ka pranuar vrasjen dhe ka dorëzuar armën e vrasjes, si dhe kishte njoftuar të njohurit e saj përmes SMS për aktin që kishte kryer.
“Përshëndetje të dashur. Kam vrarë një fëmijë që të zgjidhet çështja ime gjyqësore, pranoj përgjegjësinë nëse nuk vritem”, shkruante atëherë 75-vjeçarja, transmeton albinfo.ch.
Në gusht të vitit 2020, Alice F. është përgjigjur para Gjykatës Penale, në Bazel dhe më pas është dënuar me trajtim special psikiatrik sepse nuk kishte përgjegjshmëri penale, shkruan telebasel.ch.
Një raport psikiatrik pati vërtetuar se ajo ishte “delirante” dhe kishte fare pak shanse për trajtim të suksesshëm.
Të martën, më 29 mars 2022, Gjykata e Apelit Bazel ka konfirmuar aktgjykimin e Gjykatës Penale të vitit 2020 në shkallë të dytë. Autorja Alice F. Është shpallur fajtore për vrasjen e Iliasit, por e shpallur si e papërgjegjshmëri juridike, përcjell albinfo.ch.
Prandaj Alice F. mbahet në psikiatrik për shkak të papërgjegjshmërisë së përmendur të saj. Fajtorja duhet të paguajë 12,000 CHF si dëmshpërblim dhe një kompensim prej 120,000 CHF. Kështu ankesa e familjes së viktimës është miratuar pjesërisht.
Discussion about this post