Tremujori i fundvitit 2021 i ekonomisë shqiptare ka patur një rritje prej 0,17% në krahasim me tremujorin paraardhës duke u bazuar tek vlera e Produktit të Brendshëm Bruto (PBB) sipas INSTAT.
Po të ndalemi tek arsyet e kësaj rritje anemike të ekonomisë në periudhën në të cilën përfshihen festat e fundvitit ku shpenzimet rriten, shkaku kryesor është rritja e çmimeve në shërbimet e transportit dhe argëtimit, rritja e çmimeve por mbi të gjitha eksportet të cilat patën një rënie me 4,11% më pak se 3-mujori paraardhës.
Megjithatë për totalin e vitit 2021 ekonomia shqiptare ka shënuar rritje, duke u ngritur pas rënies drastike në 2020-n prej pasojave të pandemisë së Covid-19 sipas INSTAT.
Gjatë vitit 2021, prodhimi i Brendshëm Bruto (PBB) shënoi rritje me 8.54% i cili është dhe niveli më i lartë që nga viti 2001. Megjithatë kjo rritje e lartë lidhet me nivelin e ulët të 2020-s, ku ekonomia pësoi rënie me 3.96% më pak, e ndikuar kryesisht nga fusha e industrisë dhe transportit, akomodimi e shërbimi ushqimor, të cilat patën dhe rënien më të madhe si pasojë masave kufizuese vendase dhe ndërkombëtare për të frenuar pandeminë.
Në të gjithë sektorët ka patur rritje të fortë në vitin 2021. Me analizën e vlerësimit të tremujorit të katërt, INSTAT publikon një vlerësim paraprak të PBB-së për vitin 2021, që mbështetet në vlerësimet 3-mujore, shënoi një rritje prej 8,54 %, krahasuar me vitin 2020.
Kjo rritje u ndikua nga të gjithë sektorët, por më e madhe ishte në “Tregti, Transport, Akomodim dhe Shërbim ushqimor”, dhe “Industria përpunuese, nxjerrëse dhe energjia”, që ranë më shumë në vitin e pandemisë. Zhvillimi i ndërtimit ka vazhduar, ndërsa sektori më ecuri më të dobët ishte sektori i bujqësisë e cila është ndikuar nga rritja e çmimit të plehrave.
Produkti i Brendshëm Bruto (PBB) në tremujorin e katërt të vitit 2021 vlerësohet me rritje prej 5,52%, në krahasim me tremujorin e katërt të vitit 2020 sipas INSTAT.
Impakt pozitiv ka dhënë: Ndërtimi me +1,82 pikë përqindje, Tregti, Transport, Akomodim dhe Shërbim ushqimor me +1,03 pikë përqindje, Aktivitete të pasurive të paluajtshme me +0,73 pikë përqindje, Bujqësi, Pyje dhe Peshkim me +0,27 pikë përqindje, Administrata publike, Arsimi dhe Shëndetësia me +0,26 pikë përqindje, Informacioni dhe Komunikacioni me +0,19 pikë përqindje, Arte, argëtim dhe çlodhje; aktivitete të tjera shërbimi me +0,15 pikë përqindje, Aktivitete Financiare dhe të Sigurimit me +0,01 pikë përqindje.
Ndërsa negativisht ndikuan aktivitetet: Aktivitete profesionale dhe Shërbime administrative me -0,29 pikë përqindje, Industri, Energji dhe Uji me -0,02 pikë përqindje. Taksat Neto mbi produktet kontribuuan pozitivisht me +1,36 pikë përqindje.
Degët kryesore të ekonomisë, për tremujorin e katërt të vitit 2021, krahasuar me tremujorin e katërt të vitit 2020, shfaqen si më poshtë:
Aktiviteti i Bujqësisë, Pyjeve dhe Peshkimit pati një rritje me 1,93%. Aktiviteti i Industrisë, Energjisë dhe Ujit pati një rënie me 0,02%. Aktiviteti i Ndërtimit pati një rritje me 16,12%. Grupi i aktiviteteve Tregti, Transport, Akomodim dhe Shërbim ushqimor pati një rritje prej 5,95%. Grupi i aktiviteteve Informacioni dhe Komunikacioni u shfaq me rritje prej 5,42%. Aktiviteti Financiar dhe i Sigurimit ka shënuar një rritje prej 1,68%. Aktiviteti i Pasurive të Paluajtshme ka shënuar një rritje prej 12,00%. Grupi i Aktiviteteve profesionale dhe Shërbime administrative u shfaq me një rënie prej 4,06%. Grupi i aktiviteteve të Administratës Publike, Arsimit dhe Shëndetësisë u shfaq me rritje prej 2,02%. Grupi i aktiviteteve Arte, argëtim dhe çlodhje, Aktivitete të tjera shërbimi pati një rritje me 5,27%. Taksat Neto mbi produktet u rritën me 11,66%.
Discussion about this post