Dërgohet rëndë në spital 39-vjeçari në Vlorë, era e fortë “e hedh” nga kati i tretë i shtëpisë (EMRI)

I riu Klodian Hoxha 39- vjeç është transportuar sot në gjendje të rëndë në Spitalin e Vlorës pasi ka rënë nga kati i tretë i një banese.

Familjarët kanë lajmëruar policinë, ndërsa dyshohet se shkak është bërë humbja e ekuilibrit për shkak të erës së fortë.

Ky është rasti i tretë i aksidenteve të shënuara në vetëm pak orë në vend, ku si pasojë e erës së fortë 3 persona kanë mbetur të plagosur rëndë.

Dy rastet e para u raportuan në Kuçovë, ku një 39- vjeçar është rrëzuar nga çatia teksa ishte duke montuar një panel diellor, si pasojë e erërave të forta. Po ashtu një depozitë uji që është shkëputur nga çatia e një banese në Kuçovë, ka plagosur një 17 vjeçare e cila është transportuar në spital.

Dëme të shumta materiale janë raportuar gjatë ditës edhe në Vlorë, ku si pasojë e erërave të forta dhe stuhive pemë e materiale ndërtimi janë rrëzuar në tokë, duke rrezikuar jetën e qytetarëve.