Detaje të reja janë zbuluar nga hetimet e policisë për eshtrat që u gjetën gjatë pasdites së djeshme në zonën e Kurbinit. Mësohet se, hetuesit kanë dyshime se eshtrat e gjetura janë të një 16-vjeçari, i cili ishte zhdukur nga zona e Mamurrasit, që në vitin 2015.
Dyshimet janë tek Mariglen Gjonaj, nxënës i klasës së 10-të në Gjimnazin e Mamurrasit, i cili rezulton i zhdukur që prej vitit 2015. Asokohe, prindërit e tij deklaronin se dikush mund t’i ketë bërë keq, pasi adoleshenti atë ditë ka pasur në dorë orë Roleks dhe disa bizhuteri që kapnin një vlerë prej 10 mijë eurove.
Sipas deklaratave të familjarëve, ai ka shkuar si çdo ditë tjetër në shkollë më 18 maj. Por nuk është kthyer në orarin e zakonshëm dhe as në darkë, çka ka vënë në alarm familjen e tij. Ata kanë bërë denoncim në polici, por ndonëse kjo e fundit nisi hetimet, ende nuk ka asnjë të dhënë për Mariglen Gjonajn.
Ditën që adoleshenti u largua nga banesa për në shkollë nuk kishte marrë as telefonin me vete. Familjarët deklaronin se në fillim policia u vu në lëvizje, por nuk mundën që të bien në gjurmët e të miturit dhe çështja u harrua, me mundësinë për tu rihapur sërish.
Për këtë arsye, grupi hetimor ka kërkuar të marrë ADN-në e prindërve të djalit të zhdukur me qëllim për t’i krahasuar me eshtrat e gjetura në Kurbin. vetëm pas krahasimit të ADN, kjo mund të vërtetohet. Dyshimet janë ngritur pas ekspertizës paraprake, që grupi hetimor i ka kryer eshtrave, ndërsa policia ka kërkuar në kartotekën e saj mbi personat e zhdukur në vitet e fundit që kanë të dhëna të ngjashme me eshtrat e gjetura.
Discussion about this post