Rreth 3,7 ton hidroklorur kokaine me vlerë rruge rreth 302 milionë paund (400 milionë dollarë) janë sekuestruar nga Forcat Kufitare të Mbretërisë së Bashkuar.
Substanca pluhur përdoret për të prodhuar kokainë dhe ishte fshehur brenda një kontenieri me 20 paleta banane të cilat u kapën në Southampton Docks. Ngarkesa u inspektua prej Agjencisë Kombëtare të Krimit ku u zbulua se në 5 prej tyre kishte pluhur të bardhë. Pas analizave laboratorike u zbulua se pluhuri kishte prani të hidroklorurit të kokainës e cila përdoret për prodhimin e kokainës. Kontenieri kishte mbërritur nga Kolumbia dhe ngarkesa kishte zbarkuar më 17 mars.
Sekretarja e Brendshme Priti Patel ka përshëndetur konfiskimin e madh, duke thënë: “Ky është sekuestrimi më i madh i kokainës në Mbretërinë e Bashkuar që nga viti 2015. Ajo duhet të shërbejë si një paralajmërim për këdo që përpiqet të kontrabandojë drogë ilegale në vend se ne jemi gati t’i marrim ato”.
Peter Stevens, kreu i hetimeve të NCA, tha se ky ishte një “konfiskim monumental i kokainës”.
“Grupit të krimit të organizuar që qëndron pas këtij importi i janë mohuar fitimet masive të cilat do t’i kthente në më shumë të ardhura. Nuk ka dyshim se një pjesë e kësaj kokaine do të ishte prerë dhe shitur nëpër rrugët e Mbretërisë së Bashkuar, duke ushqyer krimin dhe mjerimin në komunitetet tona”,-tha ai
“NCA do të vazhdojë të punojë me partnerë brenda vendit dhe jashtë vendit për të ndaluar trafikimin dhe furnizimin e drogës së klasit A”.
Ende nuk dihet se për llogari të kujt po vinte sasia e madhe e kokainës.
Discussion about this post