Bashkia e Shkodrës vazhdon të ketë probleme me tenderin e pastrimit të zonës qendrore të qytetit sepse tenderi i fundit me vlerën 4,2 miliardë lekë të vjetra pa TVSH ka probleme sipas kompanisë “Eco Empire” shpk e cila ka bërë ankesë për herë të tretë pranë Komisionit të Prokurimeve Publike.
Ankesa e kompanisë në fjalë lidhet me vlerën që ka tenderi sepse përllogaritjet e zërave të kontratës duhen bërë duke u bazuar tek ligji duke nënkuptuar shkelje ligjore nga bashkia Shkodër.
Gjithashtu kompania kundërshton vendimin që e përjashton nga tenderi duke i hequr të drejtën për të garuar si dhe kërkon të rrëzohet vendimi që kualifikon kompanitë e tjera. “Eco Empire” shpk kërkon masa administrative për këto veprime për bashkinë e Shkodrës dhe nuk e ka herën e parë që bën ankesë për tenderin maratonë të shërbim pastrimi të zonës qendrore të Shkodrës.
Në 20 Tetor 2021, kjo kompani bëri ankesë për vendimin e Komisionit të Vlerësimit të Ofertës duke kërkuar rishikimin e vlerës dhe kushtet për të njëjtin tender por me vlerë më të madhe 6 miliardë lekë të vjetra pa TVSH. Edhe në këtë rast “Eco Empire” shpk kërkonte modifikimin e dokumentave duke u bazuar tek ligjet sepse procedura e prokurimit ishte e parregullt.
KPP-ja i dha të drejtë kompanisë duke vendosur të anullojë tenderin e bashkisë e cila në atë kohë drejtohesh nga Voltana Ademi si dhe udhëzoi bashkinë të kishte parasysh vërejtjet për procedurat.
Por kryetarja e bashkisë Voltana Ademi nuk i mori seriozisht konstatimet e Komisionit të Prokurimeve Publike dhe tenderi i pastrimit të qytetit i shpallur në 17 Janar 2022 u shfaq përsëri me probleme. Edhe pse vlera e fondit limit u zvogëlua në vlerën 4,2 miliardë lekë të vjetra pa TVSH, e njëjta kompani bëri ankesë tek KPP-ja duke kërkuar anulimin e tenderit dhe rishikimin e dokumentave për vlerën e fondit limit nëpërmjet vlerësimit të një eksperti.
Në datën 10 Shkurt KPP-ja pranoi ankesën e kompanisë “Eco Empire” shpk duke anuluar tenderin dhe udhëzoi përsëri bashkinë e Shkodrës të ketë parasysh konstatimet përsa i përket dokumentave.
Mesa duket problemet nuk kanë fund për bashkinë e Shkodrës e cila ka qënë vazhdimisht në vëmendje për procedurat e dyshimta të prokurimit gjatë kohës që ka qënë kryetare Voltana Ademi. Bashkia e Shkodrës ka qënë e dyta në renditjen e Open Data Albania përsa i përket tenderave me flamuj të kuq pas bashkisë së Tiranës. Gjatë kohës së Voltana Ademit u organizuan 305 tendera me flamuj të kuq të cilët mbartin dyshime të forta për korrupsion dhe favorizime sipas Open Data dhe vlera e këtyre tenderave përllogaritet rreth 17,5 milionë euro ose 21 miliardë lekë të vjetra pa TVSH.
Discussion about this post