Me anë të një postimi në Facebook, deputeti i Partisë Demokratike, Gazment Bardhi i është përgjigjur qëndrimeve të ish-kryeministrit Sali Berisha për riorganizimin brenda selisë blu. Bardhi shkruan se Komisioni i Rithemelimit po vijon një proces të njëanshëm përjashtues me emërime në kundërshtim me statutin në çdo nivel lokal. Sipas tij, kjo i shërben vetëm kryeministrit Edi Rama dhe regjimit të tij. Më tej, Bardhi shkruan se këto ndryshime kanë qëllim të marrin peng Partinë Demokratike.
“Vijimi me kokëfortësi në rrugën e njëanshmërisë, të përjashtimit dhe mbylljes së partisë, nuk është rruga drejt bashkimit, por është rrugë me vetëm një drejtim: përçarjen. Kjo rrugë i shërben vetëm Edi Ramës dhe forcimit të regjimit të tij. Në vend të reflektimit një grup individësh të vetëzgjedhur, dhe të vetëshpallur si drejtues të partisë, nën emrin Komisarë të Komisionit të Rithemelimit, janë duke vijuar një proces të njëanshëm dhe përjashtues, të gjoja organizimit të partisë, me emërime në kundërshtim me Statutin në çdo nivel lokal të partisë. Nga ky proces mbeten të përjashtuar me mijëra demokratë që kanë sakrifikuar më shumë se kushdo tjetër këto 8 vite, thjesht se kanë një mendim ndryshe nga komisarët. Ky proces i njëanshëm dhe përçarës është dëshmi e plotë e një lëvizje që qëllim të vetëm ka marrjen peng të PD për qëllime private të një individi, dobësimin e Partisë Demokratike dhe forcimin e regjimit të Edi Ramës” – shkruan Bardhi.
Bardhi gjithashtu thotë se është provuar këto ditë se PD dhe zyrtarë të saj kanë me dhjetëra deklarata kundër SHBA dhe zero deklarata kundër Edi Ramës. Ai më tej thotë se Beteja me SHBA nuk është beteja e demokratëve dhe as qytetarëve shqiptarë, por personale e z. Berisha dhe duhet të mbetet betejë vetëm e tij.
“Ashtu si edhe është provuar këto ditë, PD dhe zyrtarë të saj kanë me dhjetëra deklarata kundër SHBA dhe zero deklarata kundër Edi Ramës. Kjo zhvendosje e betejës nga Edi Rama tek SHBA, tregon se si do të jetë PD me një “non-grata” brenda saj. Nuk ka fyerje më të madhe për një parti properëndimore, që zyra e shtypit e partisë të shpërndajë zyrtarisht lajme kundër Sekretarit Amerikan të Shtetit, në vend të lajmeve dhe deklaratave kundër regjimit të Edi Ramës. Beteja me SHBA nuk është beteja e demokratëve dhe as qytetarëve shqiptarë, që vuajnë çdo ditë nga keqqeverisja e Edi Ramës. Ajo është beteja personale e z. Berisha dhe duhet të mbetet betejë vetëm e tij. Demokratët kanë nevojë ti kenë në krah SHBA, për të ardhmen e tyre dhe të Shqipërisë” – u shpreh Bardhi.
Discussion about this post