Kryeministri Edi Rama njoftoi ditën e sotme legalizimin e kanabisit mjekësor, pas rezultateve të Këshillimit Kombëtar, ku sipas tij 61% e qytetarëve kishin votuar pro legalizimit.
Por çfarë është kanabisi mjekësor?
Kanabisi mjekësor është një ilaç që vjen nga bima kanabis sativa. Kjo bimë është e njëjta që përdoret për të prodhuar drogën rekreative, e cila është e paligjshme në shumicën e shteteve dhe territoreve. Megjithatë, kanabisi medicinal dhe droga rekreative nuk duhet të ngatërrohen. Ndryshe nga kanabisi medicinal, marihuana nuk është një ilaç dhe përmban sasi të panjohura të përbërësve aktivë dhe papastërti të tjera.
Kanabisi mjekësor vjen në trajtën e një pilule, vaji, spraji për hundët ose në ndonjë formë tjetër të ekstraktit të bimës së kanabisit. Përdoret për të lehtësuar simptomat e disa gjendjeve mjekësore.
Është treguar se kanabisi medicinal lehtëson dhimbjen, parandalon ose redukton të vjellat dhe ka veti anti-inflamatore dhe antioksiduese. Sidoqoftë, kanabisi mjekësor ka edhe efektet anësore, të cilat janë ende duke u studiuar. Ato mund të përfshijnë: vështirësi në përqendrim, marrje mendsh, probleme me të menduarit dhe kujtesën, përgjumje dhe probleme me ekuilibrin.
Kanabisi medicinal mendohet se mund të ndihmojë edhe me një sërë problemesh si dhimbje kronike, artrit ose dhimbje kyçesh, ankthi dhe depresioni, çrregullimi i gjumit, migrena, çrregullimi i stresit post-traumatik (PTSD), alergjitë ose astma, epilepsia dhe çrregullime të tjera konvulsive, sëmundja e Parkinsonit dhe sëmundja e Alzheimerit
Megjithatë duhet bërë kujdes pasi kanabisi medicinal nuk është e njëjta gjë me kanabisin e zakonshëm dhe dëmet që mund të shkaktohet mund të jenë të mëdha.
Discussion about this post