Gijotina.com ka denoncuar pothuajse përditë keqmenaxhimin që po u bën Bashkia e Tiranës taksave të qytetarëve. Në vend që t’i përdorë taksat publike, për t’u ardhur në ndihmë qytetarëve që nuk po e përballojnë rritjen e çmimeve dhe kostot e jetesës, Bashkia e Erion Veliajt, sajon tenderë “hije”, të cilët nuk mund të maten e nuk kontrollohen dot, përveçse në letrat zyrtare, si shpenzime të justifikuara.
Kësaj radhe në Agjencinë e Prokurimeve Publike, ka mbërritur tenderi i radhës i Veliajt që parashikon blerjen e druve dhe shkurreve dekorative. Ky tender i cili mban numrin e referencës REF-17908-01-27-2022, ka fondin limit prej 33.625.000 milionë lekë të reja, ose rreth 340 milionë lekë të vjetra. E thënë më thjesht, 340 milionë lekë të taksave të qytetarëve të Tiranës, Veliaj do t’i çojë për shkurre dekorative, pavarësisht se Tirana ditë për ditë po betonizohet në çdo cep të saj.
Agjencia e Parqeve dhe Rekreacionit, e cila është nën varësinë e Bashkisë së Tiranës ,ka përzgjedhur dhe fituesin e tenderit dhe ajo është e zakonshmja për këto lloj procedurash, AlbGarden i Pjetër Trashaj. Kjo kompani njihet për miqësinë që ka me qeveritarë, pasi është zbuluar në Qeverinë Rama I. Në atë kohë, Pjetër Trashaj ka përfituar nga Ministria e Mjedisit një tender me vlerë 1.2 milionë dollarë kur personi që mbante pozicionin e organizuesit të dokumentacionit teknik të tenderëve në Ministri, ishte i biri. Bëhet fjalë për tenderin me vlerë marramendëse për pyllëzimin e Lurës me pisha. Kjo kompani jo vetëm që e përfitoi tenderin në konflikt interesi, por vërtetoi publikisht mashtrimin oligarkë-qeveri që bëhet në kurriz të qytetarëve pasi në vend të mbillte 45 mijë pisha mbolli fidanë.
Përpos këtij tenderi, kjo kompani është shpallur fituese edhe në vitet e mëvonshme. Rasti i njëjtë është edhe në vitin 2020, kur nga në tenderin e Drejtorisë së Përgjithshme të Pastrimit dhe Gjelbërimit në Tiranë, e cila varet nga Bashkia e Tiranës, AlbGarden shpallej fituese pa asnjë konkurrent në garë. Veliaj edhe atëherë i jepte 35.833.000 lekë të reja, ose rreth 360 milionë lekë të vjetra, për blerje drurësh dhe shkurresh dekorative.
Gjithë këto miliona lekë për shkurre dekorative, ndërkohë që Tiranës përditë po i ikën gjelbërimi nga betoni i Veliajt, do të thotë se qëllimi i këtyre procedurave është tjetër më shumë sesa punë publike. Edhe në kohë krize, gjen rastin që të ndajë ca lekë me miqtë e zakonshëm të tij. Por gjithsesi, ne do të vazhdojmë që t’ia kujtojmë Lali Erit që qytetarët po jetojnë me krizën ekonomike dhe me kostot e jetesës që po shtrenjtohen përditë, më shumë se shkurre dekorative ata duan ndihmë si të përballojnë rritjen e çmieve të ushqimeve, naftës dhe energjisë.
Gijotina.com
Discussion about this post