Ministrja e Shtetit për Marrëdhënien me Parlamentin, Elisa Spiropali ka shfrytëzuar Kongresin e Partisë Socialiste për të sulmuar PD duke thënë se me problemet e brendshme nuk mund të jenë alternative qeverisëse.
Gjatë fjalës së saj në Kongres, Spiropali tha se lufta e brendshme e ka bërë opozitën më të dobët, ndërsa shtoi se vazhdojnë të debatojnë për vendimin e gjykatës për njohjen e statutit të 11 dhjetorit.
“Spiralja e shëmtuar e luftës së brendshme të PD, kriza ciklike që ka shoqëruar humbjet ciklike, e ka bërë opozitën më të dobët, e ka shndërruar atë nga qortuese problemesh në një problem që duhet zgjidhur. Nuk janë ata si alternativë qeverisëse, kush nuk vë dot rregull në shtëpinë e tij nuk kujdeset dot për Shqipërinë. Dy “B” e partisë Demokratike është e njëjta monedhë e hedhur në hava që nuk ndryshon asgjë, duke rrezikuar që nga 200 lekë që kushtonte hipoteka e vulës të kthehet siç thonë ata në 2 lek parti. Kontrasti ynë me ta është shumë planesh, ata vazhdojnë të theren se çfarë kishte në mendja gjykatësi i vetëm për varenë dhe bravën. Unë e konsideroj fatkeq për Shqipërinë derexhenë ku është katandisur opozita”, tha Spiropali.
Discussion about this post