Autoriteti Rrugor Shqiptar njofton devijimin e trafikut në zonën e rrethrrotullimit të TEG-ut për shkak të punimeve në zonë. Sipas njoftimit, nga data 15 deri më 22 prill për intervalin kohor nga ora 22:00 deri në orën 06:00 të mëngjesit do të devijohet trafiku prej punimeve në mbikalim dhe në urët lidhëse.
Mjetet që do të vijnë nga Elbasani do të lejohen që të kalojnë në rrugën pas “TEG-ut” ndërsa ata që vijnë nga Unaza Lindore do të lejohen vetëm të kthehen djathtas në drejtim të Tiranës. Mjetet e vogla që do të vijnë nga Tirana do të kthehen në mbikalimin “Mjull Bathore”.
Mjetet e rënda e të gjata, si trajlera e maune, do të parkohen në segmentin “Mjull Bathore-TEG” (Unaza) dhe do të lejohen të kalojnë në rrethrrotullim gjatë një intervali kohe të caktuar, i cili do të caktohet nga punonjësit e orientimit të trafikut gjatë natës.
Ky proces do të zgjasë për një javë dhe punimet do të realizohen gjatë natës, ndërsa gjatë ditës do të hapet përsëri qarkullimi në rreth për të mos vështirësuar kalimin e makinave.
Discussion about this post