Fqinjët flasin për vrasjen e nuses në Roskovec: Vjehrri na kishte thënë më parë

Për fqinjët e lagjes në Roskovec ku 61- vjeçari vrau nusen dhe më pas veten paraditen e sotme, krimi që i tronditi të gjithë ishte i paralajmëruar.

Konfliktet dhe mosmarrëveshjet e hershme që nga bashkëjetesa e djalit të 61-vjeçarit me një grua të divorcuar me 3 fëmijë, çuan në tragjedinë me dy të vdekur sot në Vidhisht të Roskovecit.

Fqinjët e familjes tregojnë se Xhevair Hoxha nuk kishte qenë dakord me bashkëjetesën e djalit të tij me Merushën, e cila sipas tij kishte qenë e martuar më parë dhe kishte tre fëmijë. Madje, Xhevahir Hoxha akuzonte 30-vjeçaren se ishte bërë shkak që djali të ndahej nga bashkëshortja, me të cilën kishte një djalë 8 vjeç.

“Kishin sherre të vazhdueshme. Para tre ditësh Xhevahiri ishte te shtëpia jonë me kosore bari në dorë dhe i thash mos bëj ndonjë gafë, por ai tha që atë do ta vras. Më tha që kishte vendosur që të vriste djalin, nusen dhe veten. Më thoshte se nuk është nuse për ne ajo, i ka thonjtë e gjatë, etj. Thoshte mos e mbaj nusen në shtëpi. Nuk ta dua atë në shtëpi. Ai i kishte thënë djalit gjithmonë që do t’ja vriste nusen, edhe atë dhe do të vetëvarej. Djali ishte i martuar më parë, kishte një fëmijë 8 vjeç, por nuk e donte atë dhe u ndanë, mori këtë”, tregon e afërmja e tyre.

Ndërkohë, vëllai i Xhevair Hoxhës tregon se ai nuk e donte nusen e djalit.

“Edhe mua më thoshte ik nga shtëpia dhe ti. Nusja e djalit ka ikur dhe është martuar në Durrës. Kishin një djalë. Fatjoni (djali i Xhevairit r.sh) ishte në punë. Nuk dimë shumë detaje sepse ata nuk na pranonin. Unë i flisja, por nuk më dëgjonte”, tregon ai.

Ngjarja e rëndë ndodhi mesditën e sotme teksa djali i Xhevairit, Fatjon Hoxha ishte duke punuar me traktor në arat e familjes, ndërkohë që nëna, babai dhe bashkëjetuesja ndodheshin në shtëpi.