Enti Rregullator i Ujit (ERRU) ka publikuar raportin vjetor për kompanitë e ujësjellësave ku krahas problemeve të ndryshme që evidentohen, bie në sy fakti se banorët e Tiranës paguajnë një tarifë të lartë për furnizimin me ujë ndërkohë që nuk kanë furnizim 24/7 ditë.
Erion Veliaj ka vendosur theksin tek ideja e tij për të ndërtuar një kryeqytet europian të rinisë por megjithëse është menaxheri i financave të bashkisë më të pasur në vend, bashkia e Tiranës ngelet një dështim përsa i përket furnizimit me ujë 24/7 ditë. Madje edhe bashkia e Kamzës ka parakaluar Veliajn sepse që prej vitit 2021 ndodhet në listën e bashkive që kanë furnizim të pandërprerë me ujë.
Por kësaj liste përveç bashkisë së Tiranës i bashkohet bashkia e Durrësit dhe e Patosit të cilat kanë fatura të kripura për banorët ndërkohë që ujësjellësit e tyre nuk ofrojnë shërbim uji të pandërprerë. Natyrisht përjashtohet nga kjo listë bashkia e Korçës e cila ka tarifën më të lartë në vend për ujin e pijshëm por që prej vitit 2020 renditet tek bashkitë të cilat kanë patur sukses në këtë drejtim sepse ka furnizim me ujë 24/7 ditë ashtu si bashkia e Shkodrës.
Veliaj nga ana tjetër kujtohet për ujësjellësin vetëm kur bëhen tendera të cilët rezultojnë me flamur të kuq ku rasti konkret ka ndodhur në 1 shkurt. Në këtë rast U.K.T sh.a ka realizuar një tender me vlerë 69 milionë lekë të vjetra pa TVSH duke skualifikuar të gjithë pjesëmarrësit për të shpallur fituese automatikisht Vojsava Zenelaj. Kompania e cila mbart emrin e personit fizik nuk e ka herën e parë që merr tendera nga U.K.T. sh.a pasi edhe herë të tjera ka marrë tender për uniformat e policisë bashkiake me vlerë 159 milionë lekë të vjetra drejtpërdrejt nga bashkia Tiranë. Tenderi ka patur mungesë konkurrencë duke sjellë rrezik të lartë për ekspozim ndaj korrupsionit dhe favorizim operatorësh sipas Open Data Albania.
Sipas raportit të ERRU-së, në fund të vitit 2020 si rezultat i investimeve që janë kryer në sektorin e ujësjellësit është realizuar furnizimi me ujë pa ndërprerje (24/7 orë) i 22 qendrave urbane, përkatësisht: Shkodër, Fushë Arrëz, Lezhë, Tropojë, Gramsh, Cërrik, Korçë, Pogradec, Maliq, Bilisht, Fier, Sarandë, Himarë, Konispol, Tepelenë, Përmet, Pukë, Vau Dejës, Koplik, Peqin, Poliçan dhe Këlcyrë.
Gjithashtu gjatë vitit 2021 si rezultat i investimeve nga pushteti qendror nëpërmjet AKUM me fondet me vlerë 9,4 miliardë lekë të vjetra u arrit përmirësimi i cilësisë së shërbimeve për konsumatorët me një regjim 24/7 orë edhe për 7 qendra urbane, përkatësisht në Kamëz, Krujë, Rrëshen, Ersekë, Berat, Kuçovë dhe Memaliaj duke e çuar në total në 29 qendra urbane të banuara me regjim të pandërprerë të furnizimit me ujë.
Discussion about this post