Deklarata e kryeministrit, Edi Rama, pak ditë më parë në kongresin e Partisë Socialiste, i cili tha se vitin tjetër do i pyesim shqiptarët nëse duhet të legalizohet kanabisi për përdorim vetjak, shkaktoi shumë reagime. Por siç duket Rama ka mendime kundër edhe brenda familjes së tij politike. I pyetur nga mediat, deputeti i PS-së, Xhemal Qefalia, është shprehur se është kundër përdorimit vetjak të kanabisit.
“Unë personalisht jam kundër përdorimit vetjak, për familjet, për fëmijët tanë nuk duhet në mënyrë kategorike” – tha Xhemal Qefalia, deputet i PS-së.
Edhe deputeti tjetër socialist Bardhyl Kollçaku, tha se duke qenë se vjen nga fusha ushtarake, është kundër përdorimit vetjak.
“Nga fusha që vijë unë, ju e dini, nga fusha ushtarake kështu që ne jemi kundra këtyre për ushtrinë. Por besoj jo vetëm nga fusha që vij, por edhe për rininë kam edhe një mesazh larg drogës, sa më shumë sport për të patur një shëndet të mirë mendor dhe fizik”, u shpreh deputeti i PS-së, Bardhyl Kollçaku.
Ndërsa demokratët janë kundër edhe legalizimit të kanabisit për arsye mjekësore. Deputeti Edi Paloka është shprehur kundër jo vetëm për përdorim vetjak por edhe për atë që gjoja po e legalizon Rama.
“Jemi kundër, jo vetëm për përdorim vetjak por edhe për atë që gjoja po e legalizon Rama” – tha Edi Paloka.
Deputetdi tjetër demokrat, Ervin Salianji, ka thënë se Shqipëria nuk ka as kapacitete për të kontrolluar territorin, jo më për t’jua u dhënë të gjithë grupeve kriminale.
“Shqipëria nuk ka as kapacitete për të kontrolluar territorin, jo më për t’jua u dhënë të gjithë grupeve kriminale që do të investohen për të bërë transportin e trafikut të drogës edhe më shumë” – u shpreh Ervin Salianji.
Kujtojmë se në pyetësorin e Këshillimit Kombëtar 61% e qytetarëve votuan pro legalizimit të kanabisit për qëllime mjekësore.
Discussion about this post