Bashkia Krujë jep tender pa garë, 76 milionë lekë për një fadromë

Shpenzimi pa kriter i fondit të shtetit vijon të bëhet pa u vënë re, nga Bashkitë e komanduara nga qeveria.

Këtë herë Bashkia Krujë me kryetar Artur Bushin ka hapur një tender ku fituesi është i paracaktuar.

Dokumenti i siguruar nga gijotina.com mban numrin e referencës REF-23141-03-25-2022 dhe mbishkrimin “mungesë konkurrence”, duke shkelur kështu rregullim numër 1 të ligjit të prokurimit që është ajo e konkurrencës.

Në procedurë, ajo që vihet re është shuma e lekëve që do të shfrytëzohet nga Bashkia përmes kompanisë së privilegjuar për të blerë një fadromë me goma.

Janë jo pak por 7 584 791 lekë  pa TVSH ose rreth 76 milionë lekë të vjetra që do të përdoren nga kompania “TIMAC” sh.p.k për blerjen e vetëm një fadrome.

Jo se jemi kundër që të blihen mjete pune, por blerja e vetëm një mjeti me 76 milionë lekë është abuzim i pajustifikueshëm i taksave nga Bashkia Krujë në këtë kohë krize e rritjesh të çmimeve.

“TIMAC”, sh.p.k jo më kot u zgjodh para afatit të caktuar fitues i këtij tenderi, pasi shfaqi ofertën më të leverdisshme për Bashkinë Krujë duke përjashtuar operatorët e tjerë ekonomikë.

Artur Bushi e di që tenderi vetëm me një ofrues nuk mund të zhvillohet pasi ka cenuar konkurrencën dhe gara nuk duhet të vazhdojë, por kur vjen puna të shfrytëzimi i taksave të qytetarëve ashtu si shokët e tij ka bërë një “sy qorr e një vesh shurdh”.

Siç edhe kemi specifikuar në artikujt tanë, ky tender i është shtuar listës së gjatë të procedurave të paligjshme në një kohë kur buxheti i shtetit është duke u përballur me një serë emergjencash kriza energjetike si dhe rritja e çmimeve të ushqimeve dhe karburantit. A.L/gijotina.com