Tender 70 mln lekë për detergjent, Rakip Suli i Kamzës e jep pa garë   

Bashkitë e vendit vijojnë të mos respektojnë rregullat e prokurimeve publike në procedurat që bëjnë. Radhën për të na e treguar këtë e ka Bashkia e Kamzës. Institucioni që drejtohet nga Rakip Suli është akuzuar jo pak herë për abuzimet me tenderët, por siç duket kjo nuk i bën përshtypje.

Në datën 31 Mars 2022 Bashkia e Kamzës ka hapur një tender për blerjen e mjeteve të pastrimit. Procedura mban numrin e referencës REF-23548-03-30-2022 dhe fondin limit prej 6.983.333 lekë të reja, ose rreth 70 milionë lekë të vjetra. Në këtë tender kanë pjesë 6 kompani, Malvina Visoka, “Leon Geoup” sh.p.k, “ATLANTIK 3”sh.p.k, “EURO MEGA 2010”sh.p.k, “ANBIM”sh.p.k dhe “MURATI D” sh.p.k.

E bërë e zakonshme tashmë, edhe në këtë procedurë 5 nga kompanitë janë skualifikuar përveç fituesit. Kompanitë e skualifikuara janë “Leon Geoup” sh.p.k, “ATLANTIK 3”sh.p.k, “EURO MEGA 2010”sh.p.k, “ANBIM”sh.p.k dhe “MURATI D” sh.p.k, me arsye pothuajse të njëjta për të gjithë operatorët si “dokumenti i vetedeklarimit është paraqitur jo sipas parashikimeve ligjore dhe nënligjore në fuqi”,  “mosparaqitjen e mostrave të kërkuara” dhe “nuk ka paraqitur detergjent për lavatriçe”. Kështu tenderi është zhvilluar vetëm me kompaninë që është me formë ligjore person fizik, Malvina Visoka, duke e shpallur fituese.

Pra tenderi i Sulit i është dhënë pa garë Malvina Visoka dhe për këtë “Open Data” e ka futur në kategorinë e flamurit të kuq me mbishkrimin e skualifikimit të të gjithë operatorëve konkurrues përveç fituesit. Siç e kemi cituar në çdo shkrim, procedurat që zhvillohen me një konkurrent ose skualifikohen të gjithë operatorët përveç fituesit, lënë dyshime se fituesi është i paracaktuar. Nuk do të dukej habi që edhe ky tender ta ketë pasur të paracaktuar, sidomos kur bëhet fjalë për procedurë që i përketë institucionit të Rakip Sulit i cili njihet për abuzimet me tenderët.

Kujtojmë se Komisioni i Prokurimit Publik, në 2021-in e ka përfshirë Bashkinë e Kamzës në ‘listën e zezë’ të 10 institucioneve publike me më shumë ankesa ndaj procedurave tenderuese. Dhe Suli duke qenë se nuk ka institucion drejtësie që ta ndalë, edhe ne nuk na mbetet që tjetër që t’i themi “e pastë dorën e lehtë”.

Gijotina.com