Ministrja e Shëndetësisë, Ogerta Manastirliu, ka reaguar sot nga Parlamenti për letrën e ish-këshilltarit holandez, i cili përshkruante eksperiencën e tij në Spitalin e Traumës pas një aksidenti. Holandezi në një letër drejtuar Ramës shprehet se në spital kushtet ishin të mjerueshme, nuk kishte ujë dhe fasho, madje mungonin dhe mjekët. Më tutje ai i bënte thirrje Ramës të reagojë sa më parë, pasi atë spital vdisnin njerëz më kot. Por Manastirliu sot i ka quajtur shpifje dhe deklarata të zmadhuara ato çka thotë holandezi, si dhe akuzat që bëhen çdo ditë për sistemin në shëndetësi.
Ajo thotë se qeveria ndihet krenare që mund t’ia dalë përballë pandemisë, ndërsa problemet që janë po mundohet t’i përmirësojë me kohën. Duke thënë se në 32 vite shëndetësia ishte skandal, nuk mund të bëheshin mrekulli vetëm në 8 vjet që po qeveris PS-ja.
“Kam dëgjuar një miks akuza shpifjesh. Nuk e di pse sa herë ju flisni dhe i mëshoni të pavërtetave kënaqeni me historinë e viktimave. Sa herë përmendni viktima ju qesh fytyra. Edhe ju e dini shumë mirë që i keni shifra të sajuara.
Ka reaguar spitali. Kur flitet me transparencë flitet me transparencë me fakte. Dua t’i referohem reagimit të mjekëve për kritikat që u është bërë në këtë letër të hapur. Nëse ju i lexoni këto reagime do gjeni elementët më të mirë shkencorë teknikë. Nëse 30 vite nuk ishte investuar në shëndetësi për 8 vite nuk ndodhte magjia. Fakti që nuk u gjunjëzuam nga pandemia do të thotë se disa puna i kemi bërë mirë. Jam e bindur që qytetarët dinë të vlerësojnë dhe të bëjnë krahasime. Si sot ofrohet shërbimi shëndetësor. Ata që e kanë në dorë për ta ndryshuar janë ata që kanë marrë besimin me votë për ta ndryshuar”, deklaroi Manastirliu.
Ton Daans, ish-këshilltar në fushën e riedukimit në ministrinë e Drejtësisë gjatë kohës kur ky institucion drejtohej nga Etilda Gjonaj, tregon në letër se ishte rrëzuar në një trotuar pak ditë më parë në Tiranë. Sipas holandezit, trajtimi mjekësor në Spitalin e Traumës ishte një ferr për të, për shkak të kushteve të këqija dhe infrastrukturës së dobët.
Discussion about this post