Zamira Senkaj, parukierja që ditën e djeshme u kap me drogë në sallonin ku punonte ka dëshmuar sot para trupës gjykuese. Ajo mësohet të ketë mohuar që droga ishte e saj, duke pretenduar se lënda narkotike, e ndarë në 18 qese, është lënë në sallon nga shoku i djalit, të cilin e kishte lejuar disa herë të kalonte natën në qendrën estetike, por që ajo vetë nuk kishte asnjë dijeni për këtë gjë.
“Erdhi në darkë, më tha: nuk kam çelësat e shtëpisë, më ka ikur mami me gjyshen, a të fle gjumë këtu. Dhe unë e lashë të flinte gjumë në parukeri, por unë nuk dija çfarë kishte ai, dhe të nesërmen erdhi policia, unë nuk dija gjë fare,”- ka thënë Senkaj.
Kujtojmë se, një ditë më parë në sallon policia ka gjetur një pjatë porcelani me kokainë mbi të e 18 qese të bëra gati për shitje, të mbushura me kanabis. Operacioni u zhvillua në rrugën “Dhimitër Shuteriqi”. Pavarësisht dëshmisë, parukierja u la në burg për veprën penale të “moskallëzimi të krimit”, pasi dyshohet se e dinte që i shpalluri në kërkim Arluen Bega shiste lëndë narkotike dhe nuk e ka denoncuar rastin në polici. Për Begën, gjykata lëshoi masën arrest me burg në mungesë.
Discussion about this post