Hitleri kishte gjak hebre, reagon Izraeli: Gabim i tmerrshëm historik nga rusët

Ditën e djeshme ministri i Jashtëm Sergey Lavrov ka deklaruar se edhe hitleri kishte gjak hebre duke shkaktuar reagime të forta nga Izraeli.

Lavrov deklaroi për mediat italiane se origjina hebraike e Presidentit të Ukrainës Volodymyr Zelensky, nuk e mohon faktin se ka individë nazistë në kabinetin e tij, duke theksuar se Hitleri kishte gjak hebre.

Ministri i Jashtëm i Izraelit, Yair Lapid ka reaguar ashpër ndaj homologut rus duke bërë një deklaratë.

“Kjo është një deklaratë e pafalshme, e egër dhe një gabim i tmerrshëm historik dhe ne presim një falje,” tha Lapid në një intervistë në Ynet.

“Hebrenjtë nuk vranë veten në Holokaust,” tha Lapid. “Gjyshi im u vra nga nazistët. Të thuash se Hitleri ishte me origjinë hebreje është si të thuash se hebrenjtë vranë njëri-tjetrin dhe ne nuk mund ta falim një krahasim të tillë”, tha ai.

“Më tërbon jo vetëm si ministër i Jashtëm, por edhe si një djalë që babai iu fut në geton e Budapestit. Atë nuk e vendosën hebrenjtë. Atë e vendosën nazistët,” tha ai.

“Nazistët persekutuan hebrenjtë dhe vranë gjashtë milionë prej tyre. Ukrainasit nuk janë nazistë. Vetëm nazistët ishin nazistë dhe ata kishin kryer një zhdukje sistematike të popullit hebre,” tha ai.

Lapid tha se priste që ambasadori rus të kërkonte falje në lidhje me deklaratat e bëra nga ministri rus. Ambasadori rus është thirrur në Ministrinë e Jashtme të Izraelit për të sqaruar deklaratat.

“Para së gjithash, rusët duhet të korrigjojnë gabimin e tyre dhe të hapin librat e historisë”, tha Lapid.

Në intervistën e së dielës, ministri i Jashtëm rus tha gjithashtu se disa nga antisemitët më të këqij ishin vetë hebrenjtë.