Protestuesit e Rinasit janë larguar nga rrethrrotullimit i aeroportit dhe janë drejtuar drejt shkollës së fshatit. Ata po shkojnë atje për të treguar se sa pak nxënës kanë mundur të marrin sot pjesë në mësim pasi fëmijët e tyre nuk shkojnë dot, për shkak se me bllokim e njërit sens të rrugës nuk kanë nga të kalojnë.
“Po shkojmë në shkollë të shihni se vetëm dhjetë nxënës mund të kenë marrë pjesë në mësim sot. Unë nuk kam se nga t’i sjellë vajzat e mia në shkollë, pasi tashmë kalimi në rrugë na ka paralizuar dhe është i rrezikshëm për fëmijët që të kalojnë në këmbë. Ne do vazhdojmë çdo ditë sëbashku me fëmijët të dalim në protestë. Ne jemi të bllokuar, nuk kemi nga të shkojmë në asnjë lloj drejtimi. Ne tani jemi nisur për te shkolla e Rinasit që dhe ju të kuptoni sa fëmijë janë në shkollë. Nuk ka asnjë mënyrë si t’i çojnë. Pyetni drejtoreshën nga 200 fëmijë, 10 mund të kenë shkuar” ”, tha një banor. Sipas të dhënave të publikuara nga kryeplaku i fshatit, nga ky vendim i ARRSH preken 1500 banorë. Prandaj ata paralajmërojnë se deri në fundjave do të ketë edhe më shumë pjesëmarrës dhe protesta do të përshkallëzohet.
Discussion about this post