I shoqëruar 18 herë për vjedhje, detaje nga vetëvrasja e të riut në komisariat

Ilvi Meta, 31-vjeçari që u gjet i vetëvrarë dje brenda komisariatit të Kavajës, ishte një emër jo pak i njohur për policinë. Mësohet se, 31-vjeçari është shoqëruar 18 herë në komisariat për vjedhje që prej vitit 2014.

Sipas informacioneve, 31-vjeçari ishte dënuar në 13 mars të 2011 nga Gjykata e Kavajës me 8 muaj burg për vjedhje. Po për të njëjtën akuzë, në vitin 2012 ai u dënua me 16 muaj burg, ndërsa në datën 07 gusht të 2010, gjykata e Durrësit e ka dënuar me 4 muaj burg po për vjedhje.

Kujtojmë se ditën e djeshme ai u arrestua pasi akuzohej se kishte kryer vjedhje në një banesë. Më konkretisht dyshohet se ai kishte vjedhur një makinë qepëse dhe një prerëse pllakash.

Ngjarja dyshohej se kishte ndodhur me 2 prill, por me urdhër të Prokurorisë, ditën e djeshme u kërkua arrestimi i tij, pasi analizat kishin treguar se shenjat e gishtërinjve të gjetura në banesën e vjedhur, rezultonin të të riut. Pas arrestimit, ky i fundit është vetëvrarë brenda komisariatit, ndërsa për ngjarjen janë arrestuar tre policët që ishin në shërbim.