Pas katër ditësh protestash nga banorët e Rinasit, ARRSH ka vendosur të marrë në konsideratë kërkesën e tyre dhe të hap në të dyja senset rrugën që të çon tek aeroporti. Lajmin e ka bërë të ditur vetë ARRSH përmes një postimi në faqen e saj zyrtare, ku thuhet se rruga do të kthehet në gjendjen e më parshme. Gjithsesi, ARRSH bën apel që mjetet e tjera, që nuk kanë nevoja urgjente të përdorin rrugët alternative, për të shmangur trafikun e rënduar për tek aeroporti
“Kthehet në gjendjen e mëparshme Rruga e Rinasit, qarkullimi do të vijojë me dy sense lëvizjeje deri në një zgjidhje përfundimtare me qëllim lehtësimin e trafikut në segmentin Qafë Kashar-Rrethrrotullimi i Rinasit-Ahmetaq. Apel ynë për të gjithë drejtuesit e mjeteve që vijnë nga veriu të përdorin akset alternative për të mos rënduar trafikun në rrugën që të çon drejt aeroportit të Rinasit. Udhëtarë/turistët që marrin fluturimet të marrin në konsideratë fluksin e lartë të mjeteve në këtë aks duke përllogaritur orarin e nisjes”, thuhet në njoftim.
Banorët e Rinasit protestojnë për katër ditë rresht, pasi kanë treguar që bllokimi i rrugës në njërin krah iu pengon marrjen e shërbimeve, punimin e tokave bujqësore si dhe aktivitetin në bizneset e tyre. Madje në këto dy ditë e fundit ata nuk kanë çuar në shkollë fëmijët, për shkak se kalimi është i pamundur dhe i rrezikshëm.
Discussion about this post