Policia e Tiranës ka arrestuar dy shofera pasi kanë qënë duke drejtuar automjetet nën efektin e lëndëve narkotike. Në rrugën “Abdyl Frashëri”, shtetasi me inicialet A. A., 21 vjeç, është konstatuar duke drejtuar makinën pa rrip sigurimi dhe duke përdorur aparatin celular gjatë drejtimit të automjetit. Pas testit me aparatin drogë-testues Aquilascan, ka rezultuar se e drejtonte mjetin nën efektin e lëndëve narkotike.
Rasti tjetër është regjistruar në vendin e quajtur “Qafë-Kashar”, ku shtetasi me inicialet K., 27 vjeç, është arrestuar duke drejtuar automjetin pa rrip sigurimi, duke përdorur aparatin celular gjatë drejtimit të automjetit, si dhe me xhamat e përparmë të errët mbi normën e lejuar. Pas testimit me aparatin drogë-testues ka rezultuar pozitiv duke e drejtuar mjetin nën efektin e lëndëve narkotike.
Në njoftimin e saj, Policia deklaron se njëri nga drejtuesit e arrestuar ka përdorur 3 lloj drogërash por nuk e specifikon se kush ka qënë nga personat e arrestuar.
Policia Rrugore e Tiranës ka bërë apel për zbatimin e rregullave të qarkullimit rrugor dhe përsërit ftesën e qytetarëve që të denoncojnë në Komisariatin Dixhital dhe në numrin pa pagesë 112, çdo rast të shkeljes së rregullave të qarkullimit rrugor.
Discussion about this post