Artistja e njohur shqiptare Ronela Hajati do të hapë shfaqjen e Eurovizion që do të mbahet më datë 10 Maj. Këngëtarja shqiptare do të performojë e para në gjysmë finalen e parë të festivalit europian që pritet të mbahet në Torino. Padyshim që interesi se si do të jetë performanca e bukuroshes është i madh. Por një pjesë gjithashtu e rëndësishme është edhe veshja e Ronelës.
Së fundmi atë shpesh e kemi parë pjesë të eventeve që janë organizuar përpara se të fillojë Eurovizioni. Një ndër to ka qenë edhe konferenca për shtyp e zhvilluar në Torino, për të gjithë pjesëmarrësit e festivalit europian ku mund të themi se Ronela u shfaq si një divë e vërtetë me një look shumë unik. Po aq unik madje ishte dhe paraqitja e saj e djeshme.
Për të na folur më shumë mbi detajet e veshjeve deri më tani, Niko Komani në një lidhje me Skype për “Wake Up” ka treguar më shumë në lidhje me to.
Në një pyetje të bërë se si e komenton ai paraqitjen e saj në tapetin e kaltër ditën e djeshme ai është përgjigjur se së bashku me Ronelën janë përpjekur të sjellin diçka ndryshe në krahasim me të tjerët. Dhe atë veshje ai e ka shikuar si një vepër arti.
“Të gjithë mundohen të sjellin veshjet më të bukura. Secili do të sjelli një vizion ndryshe. Pasi fitoi Festivalin e Këngës jemi ulur dhe kemi diskutuar. Unë dhe Ronela kemi dashur të sjellim diçka ndryshe, të veçantë. Unë e kam parë si një vepër arti këtë veshje. Ishte një veshje që kur e sheh të duket si art, për muze. Ia arritëm qëllimit.”
Gjithashtu, ai më tej ka shprehur edhe mesazhin që kanë dashur të përcjellin, e etiketon si mozaik të një kishe ortodokse që është vend i dashurisë, dhe gjithashtu sipas tij është munduar të sjell trendet dhe tendencat më të fundmit.
“Ngjan si mozaik i një kishe ortodokse. Është vendi i dashurisë. Tek printi janë flamurët e të gjithë shteteve. Kjo ishte një veshje më e mirëmenduar se të tjerat. Tregon dashurinë që Ronela ka për të gjithë. Kapelja ka qenë e rëndë dhe ka pasur një bishtalec shumë të rëndë. Jam munduar të sjell trendet dhe tendencat më të fundit. Të gjitha veshjet janë shumë të guximshme. Këtë vit kërkojmë votat e të rinjve. Gjithmonë është kërkuar një këngë ritmike dhe jo baladë. Tani erdhi. Të rinjtë duhet ta votojnë sepse e kanë kënduar dhe e kanë kërcyer kudo.”
Discussion about this post