Ngjarja e rëndë që ka ndodhur dje në “Rrugën e Kavajës” ku një person nën efektin e lëndëve narkotive goditi një çift me foshnjën 3-muajshe ka sjellë reagime të forta në opinionin publik pasi Ajas Sulejmani, autori i krimit të rëndë nuk isihte patentë, ishte në kërkim gna drejtësia dhe qarkullonte i lirë në kryeqytet.
Qytetarët kanë kërkuar ashpërsimin e masave nga policia dhe për këtë çështje ka folur drejtuesi i Policisë së Rrugore, Altin Qato i cili tha se puna e efektivëve në rrugë vijon intensivisht për zbulimin dhe ndëshkimin e shkelësve. Ai tha se Ajas Sulejmanit iu hoq patenta për dy vite, krahas tre veprave penale, për të cilat akuzohet.
Qato theksoi se rregullat duhet të zbatohen edhe nga përdoruesit e tjerë të rrugës, siç janë këmbësorët pasi shumë prej tyre nuk zbatojnë rregullat e qarkullimit në rrugë.
“Nuk po e lidh me rastin e djeshëm, pasi ata që u aksidentuan dje ishin tërësisht brenda rregullave dhe u përplasën te vijat e bardha, por dua të theksoj se krahas shoferëve, duhet që rregullat e qarkullimit rrugor të zbatohen edhe nga qytetarët”, tha ai.
Qato tha se masat ashpërsohen ndaj shoferëve me shtimin e shkeljeve nga ana e tyre, ndërsa shtoi se policia nuk bën përzgjedhje kur gjobit shkelësit e rregullave të qarkullimit.
“Policia e kishte kryer detyrën me shoferin në fjalë pasi ishte gjobitur sipas përcaktimeve të Kodit Rrugor. Policia nuk mund të tregohet më e ashpër se sa përcaktimet e Kodit Rrugor”, tha ai duke shtuar se policia ka shtuar sëfundmi masat dhe kjo nuk duhet të keqkuptohet nga qytetarët.
“Qytetarët duhet ta kuptojnë se Policia Rrugore nuk punon me operacione, por në mënyrë konstante. Ne nuk kemi asnjë qëllim të rrisim të ardhurat në buxhet kur vendosim gjoba, por të ndëshkojmë dhe sensibilizojme shkelësit”, tha ai.
Pas aksidentit të djeshëm, Ajas Sulejmani do të akuzohet për tre vepra penale, të cilat janë shkaktim aksidenti me pasoja të rënda, drejtim i makinës nën efektin e lëndëve narkotike dhe largim nga vendi i aksidentit.
Discussion about this post