Kandidati për kreun e PD-së, Ibsen Elezi, u shpreh sot në një konferencë për mediat, se kërkonte shtyrjen e datës së zgjedhjeve me të paktën 14 ditë, duke e konsideruar të pamjaftueshme kohën e mbetur deri me 22 maj. Elezi kërkoi largimin nga Komisioni i Operacioneve Elektorale të Eno Bozdos dhe Albana Vokshit, si dhe akuzoi Komisionin e Rithemelimit që ka në përbërje anëtarë të konsumuar. Në këtë kuadër, Elezi tha se ai do të ofronte në PD figura të reja.
Sipas tij, këto figura do të jenë shpresë që PD të kthehet në formë fituese. Gjithashtu ai tha se Rithemelimi po ofron modelin Basha për drejtimin e PD dhe jo vlerat e vërteta konservatore.
“Kandidimin tim e shoh si një detyrim për tu përballur me fenomenet negative që po na rrënojnë çdo ditë. Si zgjidhje e kësaj situate jo demokratike brenda dhe jashtë PD, do zgjerojmë PD-në dhe do ta kthejmë në parimet konservatore. Duke rikthyer besimin që demokratët kanë humbur ndër vite. Eliminojmë kacavjerrjen dhe servilizmin që pllakosi PD-në për vite me radhë” – tha Elezi.
Discussion about this post