Drejtoresha e Komunikimit të Partisë Demokratike, Floriana Garo ka dalë në një deklaratë për mediat duke paralajmëruar padi kundrejt Gjykatës së Tiranës.
Nga selia blu, Garo ka denoncuar sipas saj praktikat abuzive të Gjykatës, duke thënë se ka pasur ndërhyrje të paligjshme në procesin e konfirmimit të organeve drejtuese të PD-së.
PD ka kërkuar nga Gjykata vendimin e pranimit të ankimit të Enkelejd Alibeajt për regjistrimin e ndryshimeve statusore të kësaj partie, por sipas Garos ky vendim nuk po vihet në dispozicion me qëllim pengimin e një ankimimi.
“Prej më shumë se dy javësh gjykata nuk jep përgjigje dhe po bëhet pengesë. Arsyeja e vetme është që dosja të degdiset në gjykatën e Apelit. PD i bën thirrje drejtuesve të gjykatës Tiranë të mos bëhen pjesë e këtij skenari të paligjshëm. PD paralajmëron se do të paraqesë kallëzim penal. Organet drejtuese të PD i zgjidhin vetë demokratët dhe nuk mund t’i diktojë askush”, tha Garo.
Discussion about this post