Pati një moment që prej gjendjes së Christian Eriksen u vu në dyshim edhe shtyrja e ndeshjes Belgjikë-Rusi. Gjithsesi, dëshira e lojtarëve të Danimarkës dhe Finlandës ishte që dueli mes tyre të vazhdonte.
“OK”-in e kishte dhënë edhe vetë Eriksen, i cili pas rënies pa ndjenja u përmend dhe foli me shokët e skuadrës nga spitali.
Për t’u solidarizuar me Eriksen ka menduar edhe Federata Angleze e Futbollit, që në mbrëmje kishte planifikuar konferencën për shtyp në prag të ndeshjes me Kroacinë.
Në respekt të mesfushorit nuk ka dalë para mediave trajneri Gareth Southgate dhe kapiteni Harry Kane. Ky i fundi ka qenë shumë i afërt me Eriksen, të cilin e ka pasur shok skuadre te Tottenham.
