Kryeministri Edi Rama ka mbledhur kryesinë e Partisë Socialiste në selinë rozë ku po mbahet mbledhja për emrin e presidentit. Kryesia e PS prej gati 90 minutash po diskuton mbi një listë emrash që janë kandidatë për postin e Presidentit të ri.
Nga raportimet mësohet se që në fillim të mbledhjes, anëtarëve të Kryesisë iu është kërkuar të dorëzojnë telefonat celularë, duke shkëputur kështu çdo mundësi për rrjedhje informacioni.
Në media kanë qarkulluar një seri emrash që nisin me Ardian Dvoranin dhe përfundojnë me Majlinda Bregun, ndërsa publikisht Taulant Balla dhe Damian Gjiknuri kanë deklaruar se janë 10 kandidatë, por nuk kanë dhënë emra.
Ditën e nesërme, në orën 10:00 do të mblidhet Grupi Parlamentar i PS-së, ku do të ketë një unifikim i të gjithë deputetëve për vetëm një emër për President, që do ta kalojë për votim në Parlament.
Ndërkohë Partia Demokratike ka paralajmëruar se nuk do të jetë pjesë e votimit. Kryetari i Grupit Parlamentar të PD, Enkelejd Alibeaj, tha se nuk ka sens që PD të marrë pjesë më në këtë procesi, të cilin sipas tij “vetëm nga ne nuk u bojkotua”.
Discussion about this post