Rasti i Librazhdit që tronditi shoqërinë ku një vajzë u kap nga familjarët e burrit me një person tjetër në krevatin martesor dhe më vonë u dhunua fizikisht dhe psikologjikisht është trajtuar dhe sot në Komisionin e Edukimit në Kuvend.
Deputetët kanë kërkuar seancë dëgjimore me AMA-n, ndërkaq kryetarja Flutura Açka është shprehur se ajo vetë e ka përjetuar keq transmetimin e videos në rrjetet sociale, madje ka shtuar se është ndjerë keq për disa ditë.
“Ajo ngjarja me atë vajzën e Librazhdit më ka tronditur shumë dhe them që është e nevojshme një seancë dëgjimore me AMA-n apo për çfarë kanë ato nevojë për nesh sepse ekzekutimi, akti ishte me vonesë. Gjerat ndodhën ligjet duhet të veprojë dhe AMA duhet të veprojë shumë më shpejt sesa veprojnë keqbërësit. Janë me mijëra vajza që kanë nevojë për mbështetjen tonë. Unë për vetën time e kam përjetuar kaq, disa ditë nuk kam qenë mirë. Për mua ka qenë në kufijtë e mesjetës” është shprehur Açka.
Në një linjë me Açkën ka qenë dhe deputeti socialist Petro Koçi. Ai e ka cilësuar ngjarjen si një “barbarizëm” pa lidhje me civilizimin e sotëm. Edhe Koçi ka kërkuar që në Komisionin e Edukimit të thirret drejtuesja e Autoritetit të Mediave Audiovizive.
“Bashkohem me shqetësimin e kryetares. Ka qenë një shqetësim që e kemi ndjerë të gjithë dhe transmetimi në portale dhe media ka qenë e rëndë. Nuk hyjmë në çështjet private, por ajo që ka ndodhur ka qenë një linçim publik, i një shtetaseje që ka të drejtat e veta, madje ka të drejtat e veta edhe të gabojë. Ka qenë një barbarizëm dhe një kthim prapa që nuk ka lidhje me civilizimin e sotëm. Unë do propozoja që një grup nga ne të bëjmë një takim me drejtoreshën e AMA pa bërë një dëgjesë publike, sepse nuk dua që ta ngacmojmë më tej. Jam dakord, reagimi duhet të jetë më i shpejtë. Kështu që unë mendoj që ne që drejtojmë komisionin, dy nga opozita dhe dy nga mazhoranca të bëjmë një takim me AMA dhe ketë ta bëjmë publike si takim”, ka vazhduar më tej ai.
Discussion about this post