Efektivët e policisë janë sulmuar sërish në veri të Kosovës, në fshatin Rudar të Zveçanit por fatmirësisht duke mos pasur persona të lënduar.
Policia e Kosovës njofton se mbrëmë, 10 qershor, në rrugën Mitrovicë – Jarinjë ka ndaluar një kamion që transportonte dele pa dokumentacion dhe se gjatë kontrollit janë hedhur mjete piroteknike nga disa automjete që janë afruar drejt njësive policore. Kamioni është shoqëruar në terminalin doganor për procedura të mëtejshme.
“Mbrëmë, më 10.06.2022 rreth orës 22:15, patrulla policore e policisë kufitare, gjatë patrullimit në magjistralen Mitrovicë-Jarinje, në fshatin Rudar të Zveçanit, ka vërejtur një kamion të cilin e ka ndaluar për kontroll. Kamioni drejtohej nga një mashkull kosovar, gjatë kontrollit të kamionit, janë gjetur 56 (pesëdhjetë e gjashtë) krerë dele. Drejtuesi i kamionit nuk posedonte asnjë dokument për origjinën ose prejardhjen e kafshëve. Gjatë procedurave të kontrollit të kamionit, kanë ardhur disa automjete të dyshuara nga të cilat janë hedhur mjete piroteknike në afërsi të njësisë policore. Nga këto mjete nuk ka pasur persona të lënduar. Kurse, kamioni është shoqëruar në terminalin doganor në Mitrovicë Jugu për procedura të mëtejme”, njofton policia.
Discussion about this post