Humbi jetën në atentatin me eksploziv, e shkuara e errët e 27-vjeçarit, përfshirja në vrasjen në Greqi

Aleksandër Sadikaj, 27-vjeçari i cili mbeti i vrarë në një atentat me tritol në afërsi të rrethrrotullimit të TEG ka rekorde kriminale në Greqi dhe Shqipëri. Viktima e atentatit me eksploziv në Tiranë rezulton të jetë i përfshirë në një krim të ndodhur gjashtë vite më parë në Athinë, mësohet se bëhet fjalë për ekzekutimin e një personi. Dyshohet se vrasja në fjalë është kryer nga Sadikaj për prishje të pazarëve të drogës. Sadikaj, mori plagë të rënda në trup gjatë atentatit sot, humbi gjymtyrët (këmbët) dhe nuk mundi t’i mbijetojë hemorragjisë në spital.
27-vjeçari po udhëtonte me mjetin e llojit tip “Golf” në momentin që lënda plasëse ishte e vendosur në pjesën e parme të makinës që u hodh në erë me 150 gramë tritol.
E shkuara kriminale
Sadikaj më 09.04.2011 është arrestuar në Berat, së bashku me një person tjetër pasi kanë tentuar të vjedhin në subjektin Alb Telecom-Berat.
Më 30.04.2011 është shpallur në kërkim nga Komisariati i Policisë Vlorë, pasi Gjykata e Vlorës i ka caktuar masën e sigurisë “Arrest në burg”, për veprën penale “Vjedhja”, kryer në bashkëpunim;
Më 31.05.2017 është shpallur në kërkim nga Komisariati i Policisë Nr.2 Tiranë, pasi Gjykata e Tiranës i ka caktuar masën e sigurisë “Arrest në burg”, për veprën penale “Kundërshtimi i punonjësit të rendit publik”. Më 23.08.2018, Gjykata e Tiranës e ka dënuar me 8 muaj burgim, për këtë vepër;
Më 29.05.2017 është shpallur në kërkim nga Komisariati i Policisë Nr.2 Tiranë për veprat penale “Goditje për shkak të detyrës”, “Mosbindja ndaj urdhrit të punonjësit të policisë së rendit publik” dhe “Kundërshtimi i punonjësit të rendit publik”;
Më 09.07.2019 është shpallur në kërkim nga Komisariati i Policisë Sarandë, pasi në bashkëpunim me një shtetas tjetër, gjatë një konflikti për motive të dobëta, kanë plagosur me thikë shtetasin A. D., duke i shkaktuar dëmtime serioze në trup;
Më datë 30.07.2019, Gjykata e Sarandës i ka caktuar masën e sigurisë “Arrest në burg”, për veprën penale “Vrasja me dashje”, mbetur në tentativë.

Makina shpërtheu ndërsa ishte në lëvizje e sipër, ndërsa dyshohet se autorët e hodhën në erë me telekomandë në distancë mjetin. Ndërkaq policia, si pistë kryesore ka të shkuarën e errët kriminale të viktimës së atentatit.