Deputeti demokrat Enkelejd Alibeaj ka reaguar pasi ish-kryebashkiaku i Vorës, Agim Kajmaku është arrestuar në Itali, teksa është kapur me 20 kg kokainë sëbashku me nipin e tij.
Në një postim në llogarinë e tij në Facebook, Alibeaj kujton fjalët e kryeministrit Edi Rama në atë kohë për Kajmakun, i cili garonte për kreun e bashkisë Vorë. Alibeaj shkruan se ndërsa PD e denonconte për aktivitete kriminale, sipas tij kryeministri Rama e mbështeste.
Demokrati thekson ndër të tjera se çfarë do të thoshte sot Rama për një trafikant droge që e bëri kryetar bashkie duke thënë se pushteti i PS është marrë me kriminele dhe trafikantë droge.
“E mbani mend kur Edi Rama thoshte “Gimi është si puna ime”? E kishte fjalën për Agim Kajmakun, ish-kryetar i bashkisë Vorë, sot i arrestuar në Itali për trafik droge. Kur PD e denoncoi me fakte aktivitetin kriminal të Kajmakut në Greqi, Rama e mbrojti, e justifikoi dhe e ia fshehu drejtësisë sa mundi. Nuk hoqi dorë asnjëherë prej sojit si ai, madje atë e përfshiu së fundmi edhe në zgjedhjet e 6 marsit në Vorë! Kurioz jam të dëgjoj se çfarë do thotë sot shefi i Rilindjes, për një trafikant droge që e bëri kryetar bashkie, siç bëri shumë të tjerë, deputetë e drejtues të lartë të pushtetit të tij. Nuk pres as të skuqet e as të zverdhet, sepse është i nxirë faqeje të gjithëve nga raportet e DASH dhe ODHIR! Me shumë gjasë sot, Edi Rama i zënë prapë mat, do zgjedhë kodin mafioz të heshtjes! Denoncimet e PD në të gjitha rastet për të inkriminuarit e tij janë vërtetuar dhe është provuar se pushteti i tij, është pushtet i marrë me kriminelë e trafikantë droge dhe me votat e non gratave të tij. Agim Kajmaku është prova më e qartë për këtë. Edi Rama erdhi në pushtet me ndihmën e krimit që blenë e mblodhën vota për Rilindjen, dhe vazhdon të qëndrojë në pushtet me votat e krimit e të non gratave”, shkruan Alibej.
Discussion about this post