“S’mban më ujë pilafi”, qytetarët thirrje për protestë edhe nga stadiumi “Air Albania”

Me anë të një postimi në Facebook, qytetarët kanë paralajmëruar për protestë në vend për shkak të situatës së keqe ekonomike. Organizata Politike ka bërë me dije se do të mblidhen ditën e mërkurë në orën 18:00 te sheshi Skëndërbej për të protestuar për rritjen e çmimeve. Për të paralajmëruar këtë protestë, aktivistët e Organizatës Politike kanë hapur një banderolë në stadiumin “Air Albania” në ndeshjen Shqipëri-Estoni.

“ZËRI I PROTESTËS DUHET TË BUÇASË NGADO Sot aktivistët e Organizatës Politike hapën një banderolë në stadiumin Arena Kombëtare gjatë ndeshjes miqësore Shqipëri-Estoni. Situata ekonomike në vend po shkon drejt kolapsit, ku 99% e shoqërisë po vuan padrejtësisht efektet e një krize të shkaktuar nga grykësia e oligarkëve dhe korrupsioni i qeveritarëve. Pakënaqësia është kthyer në mllef dhe mllefi duhet shndërruar në revoltë. Të gjithë bashkë në protestë! Askush nuk ka më luksin e të bërit sehir nga larg. Të mërkurën në orën 18:00 nga sheshi Skënderbej drejt Kryeministrisë. S’MBAN MË UJË PILAFI!” – thuhet në postimin e shpërndarë në rrjet.