Ditën e sotme Policia e Durrësit ka arrestuar dy persona të cilat dyshohet se kanë lidhje me drogën e sekuestruar mbrëmjen e djeshme në Portin e Durrësit. Të arrestuarit janë administratori i kompanisë që kishte kontejnerin, 30-vjeçari me inicialet A.F, banues në Prishtinë, si dhe agjenti doganor i kontraktuar nga kompania 39-vjeçari me inicialet E.V, banues në Tiranë.
Mbrëmjen e djeshme u bllokua një sasi prej 45.5 kg kokainë, e ndarë në 40 pako, e cila ndodhej në një kontejner ku ishin ngarkuar tonelata pulash. Ngarkesa, referuar raportimeve, kishte kaluar transit nga Brazili, ndërsa kontejneri kishte si destinacion final Maqedoninë e Veriut. Mësohet se ngarkesa me mish ishte porositur nga një firmë kosovare. Policia njoftoi se vijon puna hetimore për identifikimin dhe kapjen e personave të dyshuar që fshihen pas ngarkesës prej 45.5 kg kokainë.
Kjo është sasia e dytë e drogës që sekuestrohet nga Policia e Durrësit në port në harkun kohor të një muaji pasi më 17 Maj një tjetër ngarkesë prej 59 kg kokainë u kap në një konteiner me qymyr që vinte nga Ekuadori. Më parë janë raportuar raste të sekuestrimit të sasive të kokainës në kontenierët me banane. Ndoshta kapja e disa ngarkesave në portin e Durrësit pikërisht në këto kontenierë ka detyruar trafikantët që të tentojnë trafikimin e drogës edhe përmes ngarkesave të tjera, si në rastin e qymyrit, apo mishit të pulës.
Autoritetet shqiptare përgjithësisht nuk kanë mundur të zbulojnë rrjetin e porositësve të narkotikëve në Shqipëri, edhe pse ka pasur arrestime dhe dënime për administratorë kompanish, të cilët nuk kanë pranuar se kanë pasur dijeni për ngarkesat me drogë.
Discussion about this post