Deputeti i Partisë Demokratike, Enkelejd Alibeaj deklaroi ditën e sotme në komisionin e Ligjeve se vendi ka një problem të madh pasi kryeprokurori i përgjithshëm ankohet se nuk ka instrumente në dorë për të kontrolluar veprimtarinë e prokurorëve të tjerë.
Deputeti u shpreh se në lojë është lufta kundër kriminalitetit ndaj duhet që të plotësohen të gjitha nevojat që kryeprokurori i përgjithshëm ka.
“Kam një vërejtje. Ky Kuvend ka miratuar një vendim në vitin 2018 që përcakton mënyrën si duhet hartuar një projekt rezolutë. Duhet të tregojë edhe çështjet që janë diskutuar. Kur u bë reforma në drejtësi një nga synimet e saj ishte dhënia e pavarësisë së prokurorit të çështjes. Mund të ketë qenë synim i mirë por sot kemi një problem delikat. Prokurori i përgjithshëm vjen dhe ankohet që nuk ka instrumente në dorë për të kontrolluar veprimtarinë e prokurorëve. Ai e ka të pamundur që rekomandimet e këshillit të ministrave apo edhe detyrimet ligjore që ka nuk mund të zbatohet për shkak se nuk i binden, nuk ka mjete, nuk ka instrumente. Po interpretoj atë. Nuk di ta them sot se cila do të ishte zgjidhja. Unë e pyeta atë cila do të ishte zgjidhja më e mirë. Përgjigja e tij ishte se duhet të bëhen ndryshime ligjore. Unë nuk e shoh të pasqyruar as çështjen që u diskutua dhe as rekomandimin. Rreziku është i madh që vitin tjetër në këtë kohë të dëgjojmë të njëjtin refren. Në lojë është lufta kundër kriminalitetit. Së pari kjo gjë duhet thënë. Dhe së dyti kryeprokurori i përgjithshëm të sjellë ato nevoja që ka. Për të hequr çdo lloj justifikimi dhe alibie të mundshme”, deklaroi ai.
Discussion about this post