Ish-kryeministri Sali Berisha sulmoi sërish këtë të shtunë projektin rajonal, Ballkani i Hapur.
Në një bashkëbisedim online me personalitete shqiptare nga diaspora, Berisha tha se Open Ballkan është ideuar nga Serbia për të rikthyer hegjemonizmin serb në Ballkan.
“Harta që u paraqit atë ditë nga kjo trojkë, Rama, Vuçiç, Zaev, paraqiste haptas Kosovën si pjesë të Serbisë. Këtë hartë e publikoi në facebook-un e tij edhe Edi Rama dhe më pas th se ishte një gabim teknik i stafit. Ky projekt disa ditë pas Samitit të Novisadit, u quajt nga Vuçiç Jugosllavia e vjetër plus Shqipërinë. Kjo çon te ideja se Ballkanin e stabilizon hegjemonizimi serb. Hegjemonizëm që u vendos në shekullin e kaluar çoi në luftëra të përgjakshme”, tha Berisha.
Ish-kryeministri u bëri thirrje të gjithë shqiptarëve që t’i bashkohen protestës së 7 korrikut, për të kundërshtuar rritjen çmimeve, por dhe projektin e “Open Balkan”.
“Janë çmimet stratosferike që ngrihet gjoja nga lufta në Ukrainë, më shumë se në çdo vend tjetër të botës. Sot shqiptarët blejnë qumështin, vezën, qumështin dhe vajin 108% më shumë se në vendet e BE-së. Nafta është pothuajse dy herë më e shtrenjtë se në Shtetet e Bashkuara. Për të gjitha këto ne kemi thirrur protestë në datën 7 korrik dhe jemi të vendosur ta përdorim atë si një mekanizëm për të çmontuar këtë regjim”, tha Berisha.
Discussion about this post