Dalin detajet e operacionit “Tufina” ku 8 persona ranë në prangat e policisë mes tyre dhe drejtori në Bashkinë e Tiranës, Elidor Ndini, 32 vjeç. Sipas policisë këta shtetas në bashkëpunim me njëri-tjetrin, kundrejt shpërblimit 30 mijë deri në 50 mijë lekë të rinj kanë siguruar vendvarrime për shtetas të ndryshëm, në varrezat e Tufinës. Gjithashtu, këta shtetas mundësonin nxjerrjen e lejeve të ndërtimit për banesat e dëmtuara nga tërmeti, kundrejt pagesës 200 mijë lekë të rinj, nxjerrjen e certifikatës së pronësisë ASHK, përfitimin e certifikatave të vaksinimit kundër Covid-19, kundrejt 30 mijë lekë të rinj, si dhe përfitimin e kredisë së butë.
“Finalizohet me sukses operacioni policor i koduar “Tufina”.
Operacioni, nga Seksioni për Hetimin e Korrupsionit në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë.
Vihen në pranga 8 shtetas, procedohen në gjendje të lirë 2 të tjerë.
Shpallen në kërkim 2 bashkëpunëtorët e tyre.
Specialistët e Seksionit për Hetimin e Korrupsionit në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë, pas një pune të mirëfilltë hetimore disamujore, organizuan dhe finalizuan me sukses operacionin policor të koduar “Tufina”, në kuadër të të cilit u bë arrestimi në flagrancë i shtetasve:
– E. N., 32 vjeç, me detyrë Drejtor i Agjencisë së Shërbimeve Funerale të Bashkisë Tiranë, për veprat penale “Korrupsioni pasiv i punonjësve që ushtrojnë funksione publike”, “Ushtrimi i ndikimit i paligjshëm ndaj personave që ushtrojnë funksione publike” dhe “Shpërdorimi i detyrës”;
– Xh. M., 61 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës”;
– L. Sh., 63 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Shpërdorimi i detyrës”;
– G. D., 49 vjeç, me detyrë punonjës i Sektorit të Varrezave Tufinë, në Agjencinë e Shërbimeve Funerale të Bashkisë Tiranë, për veprën penale “Korrupsioni pasiv i personave që ushtrojnë funksione publike”;
– B. L., 66 vjeç, për veprën penale “Ushtrimi i ndikimit të paligjshëm ndaj personave që ushtrojnë funksione publike”;
– A. A., 28 vjeç, për veprat penale “Ushtrimi i ndikimit të paligjshëm ndaj personave që ushtrojnë funksione publike dhe “Korrupsioni pasiv i punonjësve që ushtrojnë funksione publike”;
– E. M., 37 vjeç, për “Ushtrimi i ndikimit të paligjshëm ndaj personave që ushtrojnë funksione publike” dhe “Korrupsion aktiv i punonjësve që ushtrojnë funksione publike”;
– F. Gj., 24 vjeç, për veprën penale “Ndërtimi i paligjshëm”.
Gjithashtu, u proceduan penalisht në gjendje të lirë shtetasit R. N., 44 vjeçe dhe J. Ç., 31 vjeç, për veprën penale “Shpërdorimi i detyrës”.
Në vijim të veprimeve u shpallën në kërkim shtetasit Sh. N. dhe F. Gj.”-njofton policia.
Discussion about this post