Një ngjarje e frikshme ka ndodhur në Itali, ku presidenti i skuadrës së Lecce-s, Saverio Sticchi Damiani është kërcënuar. Në derën e shtëpisë së tij dhe të studios ligjore në pronësi të tij, pasi ai është avokat, u vendosën 2 koka derri të prera.
Së bashku me to ishte dërguar edhe një letër me kërcënime. Policia ka nisur hetimet dhe po vijon punën që të zbardhë këtë ngjarje. Sipas asaj që shkruajnë mediat, kokat e derrit ishin mbështjellë me qese plastike. Ato u gjetën nga administratori i pallatit ku jetonte Sticchi Damiani.
Kjo nuk është hera e parë që ndaj përfaqësuesve të Lecce-s, e cila këtë vit u ngjit në Serie A, dërgohen mesazhe kërcënuese.
Në Maj, iu dërgua një letër me përmbajtje kërcënuese Luciano Barbetta-s, një sipërmarrës në sektorin e tekstileve dhe anëtar i ri në bordin e Lecce-s. Hetuesit po punojnë për të gjetur lidhje mes këtij episodi dhe asaj që ndodhi tani me Presidentin Sticchi Damiani.
Kush është Sticchi Damiani?
Saverio Sticchi Damiani është Presidenti i Lecce-s prej vitit 2017. Ai është profesor në Universitetin e Salentos për drejtësi.
Babai i tij është një avokat i njohur në Lecce, themelues i firmës ligjore që ka mbajtur mbiemrin e tyre që prej vitit 1966. Familja Sticchi Damiani është një nga më të fuqishmet në Salento
Discussion about this post