Marita Hajdari është një tjetër viktimë mashtrimi nga afera e inceneratorëve, pasi rezulton pronare e një prej kompanive të aferës së inceneratorëve. Ditën e sotme ajo i është drejtuar vetë zyrave të SPAK për të bërë denoncimin në lidhje me rastin. Teksa emri i saj del si përfituese e kompanive prej disa miliona eurosh, Merita Hajdari rezulton në të vërtetë të jetë tepër e varfër pasi pasuria e vetme që ka është një thes i grisur me të cilin grumbullon kanoçe dhe mbetje të tjera të riciklueshme në koshat e mbeturinave të rrugëve të Tiranës.
Hajdari është vetëm një prej emrave të shumtë që dalin në aferën e inceneratorëve, ku mes tyre ka azilantë, mbledhësh kanoçesh e çobanë, të cilët kanë nisur prej ditës së sotme të paraqiten në SPAK.
E moshuara në fjalë është paraqitur para dyerve të Prokurorisë së Posaçme së bashku me djemtë e saj, pasi ka dëgjuar emrin t’i lakohet në media. Ajo ka thënë se merret me mbledhje kanaçesh në rrugë e kosha mbetjesh dhe nuk ka lidhje me ato çfarë përmbajnë dokumentet që e bëjnë pronare kompanish.
Discussion about this post