Deputetja e PD, Jorida Tabaku, ka folur sot në lidhje me amnistinë fiskale. Përmes një postimi në Facebook, Tabaku shprehet se amnistia do t’i shkojë për shtat çunave problematikë që do të pastrojnë paratë e drogës dhe krimit, duke e bërë madje në kurriz të shqiptarëve që tatohen plot 23% nga qeveria për të ardhurat e tyre. Sipas deputetes është absurde që vendi ynë merr një nismë të tillë në kohën kur vendet e europës po shtrëngojnë masën kundër pastrimit të parave.
“Amnistia Fiskale është një projekt në thelb promovon pandershmërinë, pabarazinë para ligjit, formalizon shkeljen e ligjit por gjithashtu provokon një amnisti fiskale për paratë e pista duke cenuar procesin e integrimit. Kjo nismë ndërmerret sot kur të gjithë vendet e BE dhe jo vetëm kanë nisur politika shtrënguese ndaj pastrimit të parave, përfshirë dhe Britaninë e Bashkuar.
Shqipëria sot është në udhëkryq ndaj duhet ta kemi të qartë që vendimet e qeverisë, ligjet dhe drejtimi që do të marrë do të ndikojnë për dekada me radhë. Pra e ardhmja e vendit dhe shoqërisë sonë është sot në valle”, u shpreh ajo.
Tabaku tha se faktet tregojnë që amnistia po bëhet për të mbuluar skandalin e pastrimit të parave nga kullat në Tiranë dhe qytetarëve po iu shitet si lëmosh dhe ndihmë. “Në një kohë kur inflacioni ka arritur në vlerat më të larta në 2 dekada, Rama dhe të tijtë e shohin amnistinë si shpëtim nga kriza që ka kapur buxhetin e shtetit dhe mbi të gjitha xhepat e shqiptarëve. Duan të shesin amnistinë e krimit si një ndihmë dhe lëmoshë për qytetarët. Duan të shesin pandershmërinë si një formë për t’i bërë shqiptarët bashkëpunëtorë në bastisje. Prandaj duan veçse formalizmin e kriminalizimit dhe korrupsionit në 8 vitet e shkuara dhe të godasin biznesin e ndershëm dhe shqiptarin që punon 7 ditë në 7 për 12 muaj”, thekson Tabaku.
Discussion about this post