Naimi ka ditëlindjen! Por jo vetëm, e ka edhe Ilda! Dy qytetarë të zakonshëm në Elbasan, ndoshta edhe të angazhuar me Partinë Demokratike, por që me siguri në 16 korrik 2022, për herë të parë në jetën e tyre, kanë pasur fatin të festojnë edhe me 5 deputetë të Partisë Demokratike.
“Një pasdite e paharrueshme në Elbasan! Me miq, demokratë të vërtetë dhe kolegë, për t’i uruar ditën e lindjes, Ilda Harrit dhe Naim Metes! Edhe 100 vite te tjera plot shëndet e mbarësi të dyve!”, shkruan Enkelejd Alibeaj në rrjetin social.
Dhe Alibeaj nuk është mjaftuar vetëm me urimin, apo me vajtjen e tij në Elbasan për të uruar dy qytetarët që kishin ditëlindjen. Ai ka organizuar edhe 4 deputetë, të tjerë, ku nuk mund të mungonte Gazment Bardhi, i cili në zgjedhjet e fundit parlamentare, ishte edhe drejtues politik i PD për qarkun e Elbasanit. Festës i janë bashkuar edhe Zheni Gjergji, Lefter Gështenja dhe Merita Bakiu.
Nuk dihet se çfarë mund të ndodhë nesër ose në ditët në vijim, por me siguri nëse keni ditëlindjen mjafton që të njoftoni një nga 5 ligjvënësit dhe ata do ju vijnë t´ju urojnë bashkërisht.
Discussion about this post