Covid-19 në Kosovë, dy viktima dhe 1.793 raste të reja në 24 orë

Dy persona kanë vdekur dhe 1.793 të tjerë kanë dalë pozitivë me koronavirus, bëri të ditur Ministria e Shëndetësisë së Kosovës.

Sipas raportit ditor, rastet pozitive dolën pas testimit të 4.513 mostrave apo 39.72 për qind e mostrave dolën pozitive për sëmundjen Covid-19.

Radio Evropa e Lirë shkruan se numri i rasteve të reja paraqet një rritje krahasuar me një ditë më parë, kur u regjistruan 842 infektime me koronavirus.

Në 24 orët paraprake janë shëruar 174 qytetarë, ndërkaq raste aktive me koronavirus aktualisht janë 8.035.

Sa i përket vaksinimit, autoritetet shëndetësore kanë administruar 263 doza të vaksinës kundër koronavirusit.

Në total, deri më tani në Kosovë, 903.764 persona janë të imunizuar me një dozë të vaksinës. Me dy doza janë imunizuar 824.036, ndërkaq me tri doza 104.132 qytetarë.

Së fundmi, Kosova ka nisur të japë edhe dozën e katërt të vaksinës për personat mbi 60 vjeç dhe sipas të dhënave, deri më tani me dozën e katërt janë imunizuar 852 qytetarë.