Kapen me kokainë, vihen në pranga 2 shqiptarë në Itali

Dy 29-vjeçarë shqiptarë janë vendosur në pranga nga policia italiane pasi akuzohen për trafik droge dhe për rezistence ndaj oficerëve të policisë.

Të dy shqiptarët të cilët punonin si banakier në një lokal në Loano të Italisë e kishin kthyer vendin e punës në një pikë të tregtimit të drogës.

Policia kishte pikasur lëvizjet e dyshimta të narkomanëve brenda lokalit në Loano, si dhe vizitat e shpeshta që kryheshin në një ambient nëntokësor ngjitur me lokalin, që shërbente për ruajtjen e ushqimeve dhe pijeve.

Në një operacion blic, policia italiane ka ushtruar kontrolle në ambientet e lokalit me ndihmën e njësisë së specializuar të qenve. Policia ka hasur në rezistencën e dy shqiptarëve të cilët u përpoqën të pengonin operacionin e policisë.

Gjatë kontrollit, brenda dhomës së përdorur si depo në një raft mes shisheve me pije freskuese dhe verë u gjetën sasi kokaine dhe marijuane e ndarë në doza, shoqëruar me materialet e tjera për ta paketuar.

Të dy shqiptarët janë vendosur në pranga dhe do të dalin para gjykatës për t’u njohur me akuzat ndaj tyre.