Editorial nga Gijotina.com
Pavarësisht faktit që i dridhet timbri vokal kur dëgjon inceneratorë apo bana-king, edhe pse s’ka folur ende as një gërmë për kërcitjet e kallashit në bandat që asgjësojnë njëra-tjetrën para syve të Gledisit, sot i gjithëpushtetshmi merr edhe ishullin e fundit të mbetur në këtë vend: Presidentin e Republikës. Shteti sot është tërësisht nën komandën qendrore të kingut të Surrelit! Që mos iu duket aspak habi, shumë shpejt do të dëgjoni ndonjë propozim që Surreli të shpallet Zonë e lirë, e më pas pse jo, edhe kryeqytet…
Hyrja në zyrë sot e presidentit të Ramës dhe mbyllja e stuhisë Meta ka definuar tërësisht të gjitha pushtetet në duart e piktorit që vuri para doktorin e shtangistin. Tashmë i ka të tëra të tëra, të tëra! Hall për të është çfarë nuk ka… Natyrisht i ka mbetur edhe futbolli, por atë histori e ka lënë se, janë dallgë të mëdha me topin. Dhe i bie autogol pastaj.
Sot Meta ikën në Lalz nga Presidenca si qytetar. Institucionin e merr shef Baromi, ose më saktë preferenca e Surrelasit që tashmë ka lojën e shahut përpara si dikur Toto Riina kur asgjësonte krerët e shtetit e të drejtësisë. Tashmë Ed Rama prej sot ka tagrin të kontrollojë tërësisht dhe gjithçka në këtë vend. Ka mbetur vetëm opozita. E shkërdhyer edhe ajo në njëqind anë dhe me doktorin që se lënë rehat e që nuk është dorëzuar ende.
Kushtetuta sot dorëzohet fiktivisht te Bagaj, por faktikisht është te Rama që prej 4 qershorit. Të gjitha arteriet e këtij shteti janë në pulsantët e surrelasit që përballë ka vetëm… asgjënë. Meta pritet të shndërrohet nga garant i Kushtetutës në garant të opozitës. Një kauzë i bashkon me doktorin, ani pse kohët e fundit qasjet publike të kreut të shtetit në ikje, kanë lëshuar indicie dashurie në rikthim.
Kishte dhe ka gjithçka. Sot mori ne inventarizim edhe Presidencën e Republikës. Çfarë i ka mbetur? Asgjësimi i Saliut, aneksimi i Metës dhe riformatimi i hartës narko-kriminale. Këtë të fundit e ka pak merak por po e bluan…
Discussion about this post